Editar Ólor Fonsón Rohingya Kavita (5)wá| 2021 Con, Januari

Arakan Sára 

Sayed Hussain @ Ro Maung Kyaw Nu

Tui sára

honó zagat tórr nái

Tui sára

honó zagat izzot nái

Tui sára

honó zagat cánti nái

Tui sára

cúk faibár rasta nái

Tui sára

cánti faibar zuu nái

Tui sára

téñgor tóle meçi nái

Tui sára

tiyai bóllá saiya nái

Tui sára

gúmzai bóllá caça nái

Túi sára

ouhóman sara din nái

Túi sára

móc kíl sara táim nái

Túi sára

e duniyát kissú nái

Túi sára

honó zagat héfazót nái.

Tándá Míyár Kúaf

Mayur hálór kulot oh bái Tándá míyár gór,

Báça óilé tó jeentén zuar ailé dhor.

Hainda bánge baricát haré zai hobi,

Dui-ek hani jobin asé hálót zargoi lé dhufí.

-Oh bái zargoi lé dhufí.

Teillar matát tel oh bái eñrayar matát beil,

Fáçáyar jobin báñgí tuwangojjar jobin bórér.

Halór ekul bángí okul zomer hoçé tái fábi?

Dui-ek hani jobin asé hálót zargoi lé dhufí.

-Oh bái zargoi lé dhufí.

Dui-ēk hani hólát lóyé duácíró zobin,

Házánát zágoi eddók dhán hozzo zágoi hodin.

Tuwangojjar gorur zala ar hoçé zaibi?

Dui ēk hani zobin asé hálót zargoi lé dhufí.

-Oh bái zargoi lé dhufí.

Roté hamai foñté zargoi honó moksús nái,

Ei girostir hon madánót ekkíh cúk fái?

Hoçé zailé faiyum oh bái báiggó lokkír sabí?

Dui-ek hani jobin asé hálót zargoi lé dhufí.

-Oh bái zargoi lé dhufí.

Tar gór báñgí zágói boicámmaccá zóré,

Mayur kúlór tándá míyár kúáf báñgér hon hosúré?

Doinálí boyar reyó tar saraq zagói nifí,

Dui-ēk hani zobin asé hálór zargoi lé dhufí.

-Oh bái zargoi lé dhufí.

BOLIBAZAROR FURANI

Zuwaror faní dázjár agá

Báçar faní soler lamer

Fuk mikká saile báiyan

Furmá Hálor monot uçér

Hãi eskulót añará zaitam

Leká forá mondi goittám

Monot uillé cúk façí uçé

eskul gán añár sugót báce

Foronor khalor monot fore

Baganot zai boyar háitám

Eir-eir eir-eir boyar bailé

Dil cánti óu fúñwati boilé

Fúñwajjá gunór monot uçér

Fúl baganór kúcbo aiyér

Gulap fúlor kucbó boyar

Bool-kálar mathót zai boilé….

Bool-kálat duñra duñri

Kellúng kálat akkuá féli

Bolibool lói esperiñg maille

Dorfór dorfór dile goré

Añarár mathór monot uçé

Rasta gáñçá fattór kéla

Arafara góndhi ura

Bolibazaror cokól suurot

Ek Kunaye mon bóre

Fanír góra keñle keñle

Bazar añár cúnar bazar

Dake mancé Bolibazar

Sairó-mikkar manúic aiyé

Shukkúr, combár bazar bóre.

Gulafir fan háile moza

Yahyar fan sairo mikka

Muwa muwa fanor duwan

Totor-khari bazaror caan

Doiyór áñçí góra fán-fán

Fara añár cúnar fara

Cót cot bosóror miyar fara

Házar házar yadgarir bóra

Arakan decór hóillá zará

Hárai dilám kuwal fáça.

Fut-ziir fikír no-moríte goró

Oo adoror Bab-maa

Duniyair kéti balá no-óufán

Tuáñrá duníyar uore táité

Fut-zii, nati futi yáinór

Zindigi ré mozbut gorí

Tíyá gárai dizo

kúñçáré hoskai gañri dizo

Tuáñrá morizái baáde

Fut-zii yáin nati-futi yáin

Dúk nofafán… dúk nofafán

Oo adoror Bab-maa

Fut-zii yáinóré

Taalibi elóm beec beec cíko

Dini elóm beec beec foró

Tuáñrá mori gilé gói

Fut-zii yáinné zati bái-bón óré

elóm cíkai batti zolai faribo

Dini elom or borkote

khobor foór goríbo

Oo adoror bab-maa

Fut-zii yáinnór muumór zindegi

Fattór no bonefán

Fottí októt fottí segént

Báfi zo fikír goro

Fut-zii zodi ator bone

Háiñr uríbo sairó kune

Alem boni, Macthor boni

Dakthor boni, raabár boní

Soddari gorí bab-maar rakíbo nam

Koumor bonibó caan

Oo adoror bab-maa

Fut-ziir mustekbel goró alicaan.

Hálor Aágár Riti

Noiya baricá álloi zaitam bilot

Áillá girós bát haitám bõi ailot

Áal eridi zaitam bói hamot

Fanor borok ditam murár dákotti

Monot aséní hálor aágár riti.

Noiya cítkaillá Kéti holá

Háitám duiñfiçá ar binibátór dola

Ki cúndór dánór holá

Arzu lager hálor aágát zaibollá erí

Monot aséní hálor aágár riti.

Cúdin áile kúci goittám rasta gáñçá

Tin maic sori nou maic gácchári

“Zaillar háñt zu.. áillár ek zu”

Ruwaiñgár bosson mocuur nóní

Monot aséní hálor aágár riti.