The Blog

Editarór fosón Rohingya Khavita (5) wá

 

” Rohingyá bólí eduun ká Fèrcani “

– Múhammad Ayas Sayéd

Ek hottó hái ar ek hottór hóbor nái
Gorí bóllá ham ó nái
Kemfót mazé forók ó becí
Honó ham nofai rohingyá bolí
Bólentíar mozuri ham gorí
Dine fai fañs cót tíyañ gorí
Ek hottór bazár gorí
Dui tin dín hái thaní kéñsi
Rohingyá óiyí bóli edún ká fèrcani

Aró fizarat doíl kemfó ré
Gíra díya kéñrá síyolloí
Lorá sora bon gorí
Geathot buwaiyé soikkaldi
Ek kemfót tún ar ék kemfót zaiti
Duk zagói hári hári
Rohingyá óiyibólí edún ká fèrcani

Róhingyá hoí déc sárí
Arái takír rifúzii boni
Zindégi haraír forbácí
Rait thíyá faará táki
dín thíyá hám loi duwadi
Tó fura de oín dóraí dí
Honé ár kíyólla dér ó hōí nofarí
Honó kíyé nó rukéddé róhingyá bolí
Gura burá furi zaír gói oínot fóri
Róhingyá óiyibóli edún ká fèrcani

(29-06-2021)

 

” Baricá “

– AH Ali Ammor

Baricá ailé monót uré
Nizór decór hotá
Faníban urílé záppuraitam
Hoto dillá kalá
Endéla kucír dec accíl
Tarif gorí nofura
Baricá ailé doittó zaitám
Ambaçá uzání guillá
Zák-zak urító gudá fera
Zóror fuçár age age
Monót uré decór hotá
Eskulot zaitam sáti sará
Zórdilé oitám bízafurá
Ah! kiki gójjílámdé añárá
Hoisálí goré mon fizara
Monot urílé decór hotá.

(21-06-2021)

Baf-Maar Furani

– Pan Thar

Tuáñrá sára honó kiya
Nofair cántir moza
Urér tuáñrár yaadgari
aró zorér sukór fani.

Añáttún nái sukot fani
hainte hainte tuáñrállá bóli
Honó októt fórai no-fari
Monót uré bicí bicí

Gura halor kúcir zindegi
Yaadgarir sóra gáti
Zodi Eid ar forok ailé
Sugór uore dekírfán lage.

Fotti khúcir moukat mazé
Ocántir dhólot mazé
Monot urér tuáñráré cúkfarí
Sína búrér sukór faní.

Oh mor zidegir tara!
No-goijjó tuáñrá sinta
Ar no-goijjo nak-muk hala
Allahr rahámot zórifóruok tuáñrallá.

Añár duniyar tuáñrá suk
Añár duniyair tuáñrá cúk
Saibóllá ek-bar tuáñrár muk
Hái ré hái goré añár vuk.

(14-06-2021)

” Rohingya Zati “

– Lalmoti Khan

Añára óilam Rohingya zati
Arakan decór báci
Házaar Bosór táki accí
Arakanor ó decíttá boni..

Bosór bosór Eid goijjí
Rosóm añára ada goijjí
Bosór bosór Kurban goijjí
Islamór nammán foor raikkí..

Añára óilam Rohingya zati
Arakan decór báci
Házaar bosór táki accí
Arakanor ó decíttá boni..

Arakan oré foor goijjí
Cíkkita añárar góre-gore
Arakanor ó fúl kaháníré,
Kabya, Boson banai raikkí…

Añára óilam Rohingya zati
Arakan decór báci
Házaar bosór táki accí
Arakanor ó decíttá boni..

Nam ó, dec ó loiyé harí
Milithírir hókumót gorí…
Bormár kaháníré algai sailé
Rohingya óilde decór asól báci…

Añára óilam Rohingya zati
Arakan decór báci
Házaar bosór táki accí
Arakanor ó decíttá boni..

Dórmo zaat forók gorí
Nafórotór oinnor batti
Thakidiyé Rohingyár matár uottí…
Fotti ekkán loiyé harí
Rohingyar cántir azaadi…

Añára óilam Rohingya zati
Arakan decór báci
Házaar bosór táki accí
Arakanor ó decíttá boni..

Aheríttú…
Rohingyaré mari dóri
Kessúré goijjé Rifujii
Nosól fúrar corca goijjé
Tarár iccá goijjé fura-furi…

Añára óilam Rohingya zati
Arakan decór báci
Házaar bosór táki accí
Arakanor ó decíttá boni..

Rifujii boni táikki añára
Arakanor ó monot raikkí…
O Allah tui kobul fórma
Rohingyár ó sugór faní…
Nizor namman nize dórí
Ekdin azadi loi soli keéne fari…

Añára óilam Rohingya zati
Arakan decór báci
Házaar bosór táki accí
ToArakanor ó decíttá boni..)2

(24-06-2021)

 

Texí

Roshan

Hontú aiyór horé zor
Nái honó tíkana tor.
Foñte gáñre hoto facíndár
Félai ailí dar ba dar
Kéne fúrár wail, Kéne fúrár tel,
Mazé mazé thorí októ guñra gel.

(19-06-2021)

Leave a Comment

Your email address will not be published.

Your Comment*

Name*

Email*

Website