The Blog

Editarór Fosón Rohingya Khavita 5 Wá 

Julai Mac , 2021

Juwan Dilor Fosón Tui “

Lé: Chit Phyu

Fool kucbo tuwar toré

Fool banailí mui besararé

Jawan dilor fosón tui

Fúlor holi baganor foori

Mor cóppónor gulafi

Jawan dilor fosón tui

Dilor sókína adoror bisana

Mor foranor fúñwajja

Juwan dilor fosón tui

Eskulot kitabot holomor agat

cúde zofe tor namor tosbí

Juwan dilot tor siyará raikke gañti.

Añárá Keené Foittó Nodi?

Lé: HB Khin

1) Tuñí ar añí zani,

randá bará zoruri

Gorór gucthír cántillai bóli

Dúa faala gorí añará,

gaar hoñsora cáraibollá

Tuñí dilá moór mari,

siríf maiya fuwainór zimma boli

Mogor tará také kúci háñci,

Allahr rahámotor acá gorí

2) Tuñí ar añí taarí,

elóm hoda híyan notailé fari

Ziyan é de asól cánti,

Gom hóraf forók gorí,

Allah Rossul siní fari,

Ar ekzonor bálai gorí,

Dukkór zindegi bodolibár,

añará fari acá gorí

Tou keené añará foittó nodi?

3) Tuñí ar añí gorí sinta,

dui bosór forái diyum biyá

Dhoñr futúni gura futúni,

randá bará cíkke ní,

Dúa faala fare ní,

Tuñí ar añí nogorí sinta,

keen gorí cára dillor hoñsara

Rohingya zati bodoli bólla

Foittó kiyollá nodi añará?

4) Maar haiya burá,

rainté-rainté nizorlló

Khonotté nohōi añará

Oo maa keené randí ba

Keené hōi añará nofoittó fonná,

bazái di boicór baána

5) Hoité hoité boson,

boni giyói rosóm

“Fonná fori gorí bí ki”

Tuñí ar añí zani ki

Fonná forí goré ki

Foroyá zane bicí

Sulár duwaror baána dí,

foittó nodoun or maani ki?

6) Maiya fuwainór zati,

foirór tolar móiná meçi

Kuñwaijjá faile meittha góra

Misterí faile eith ór berá

Tuñár hátot fúñth or dola

Abar báfo ki banai bá.

E Zobanar Fúñwajjá

Lé: Salah (Doinnya Wati)

Cóñrottun lóta forí aiyí ekku fúñwati

Kiyóré loot fa nitti-fítti

Ar kiyór hóbor nofa giyói lóti

E zobanar hodun fúñwajjá yé

hóbor nolou morilé oddó

Ar hodun é fúwañjja hoilé tuwai dola ó.

Hoduné nizor fikir nize goré

AR hoduné nizor fúñwati

fúñwajjá re yó monot goré.

Kamiyab óiyé o fúñwajjá

Zibáyé monot goijjé tar fúñwajjá

E zobana ibát mazé

Fúñwajjar oddó dizain bodole

Agor gún lói map di sailé

Asman loi zomin loi forok óiyé

E zobanar fúñwajjat mazé

Hétolla hodun fúñwajjá tun hárí soli

Buraittún basi táki

Gom ham oré gorát táki…keen?

Kurbaan

Lé: Dialogue Partner(Mehmaan)

Gaa dúítám fózorót

Eid forítám mosóidót

Feñs norakí añár monot

Kurbaan ditam bor bolot.

Gusso kuçi borokot

Foóñsái dítám cómázót

Háte háté tóilá lói

Góré góré ditam bói.

Lal morisor gussor zúl

Luçi fiçá burai tul

Suk muk háçi maille thaan

Kúci óitó mor fouran.

Bái bérádór fut-zií lói

Beraitám bói garí lói

Añí tákí dé farkulot

Añár mon giyói Arakanot.

Aar nohañdic obuz mon

Duwa gojjúm foittó zon

Zai farifán wotónót

Kurban goittám Arakanot.

Nosíyót

Lé: Afnaan bin Dhatu

O Arakan decór musólmán

No boniyó Allah nafórmán

Koum besi nohamaiyó foicá

Gair koume saibó toñcá

Nitti rakíyó koumor dorót

Barbár zaiyo bab-maar górot

Nodiyó furani nohoiyó zalani

Odárdár tiyañrafar aibó tollá ekbar

Bái yé bái yé ettefáki

Góre góré hámdorodí

Zindegi goijjó bái-boin boni

Táikkó nitti fara bañdí

Sóllukór noo faarót sole

Sólluké mancór hímmot bone

Zák sirá goru bag é há

No táikkó bái háligaá

Nohái noloilé yó foríyó elóm

No banai yó fut-zii bedom

Na-hábái yó hárami banai yó nomazi

Nekkar fut-zii táibo sáhará boni

No goríbó nafórmáni tákibo sobór gorí.

Leave a Comment

Your email address will not be published.

Your Comment*

Name*

Email*

Website