(more…)
အပတ်စဉ် ကဏ္ဍ ၊ ဖေဖော်ဝါရီလ( ၂၁) ရက်၊ ၂၀၂၂။
ငါတို့ရဲ့အနာဂတ်
ရေးဖွဲ့သူ- (Benazir Salim)Zoe Blossom
အမုန်းတရားနဲ့ သန္ဓေတည်လို့
တိုက်ပွဲတွေပေါက်ဖွားလာ
သွေးကြွေးတွေဆပ်နေရတာ
ဒီပထဝီမှာ… ငိုကြွေးသံတိုးလာ။
စိုးရိမ်စိတ်ကြောင့်
အကြောက်တရားနဲ့လန့်လျက်
မေတ္တာတွေပြတ်တောက်နေရတာ
ဒီကမ္ဘာဟာ… တစ်ကိုယ်ကောင်းဆန်လာ။
ကျည်ဆံယမ်းငွေ့တွေ
မီးတောက်တွေကြားမှာ
ဖြူစင်တဲ့ပန်းခြံလေး လွတ်ကင်းပေးပါလေ
မီးစာမီးပွားများငြိမ်းသတ်ပါရစေ။
တောက်ပတဲ့အနာဂတ် လျှောက်ဖို့
အတိတ်ကိုမေ့စို့ကွယ်
မျက်တခတ်လှုပ်တိုင်း
တိမ်ပေါ်ရောက်တဲ့ဘဝကို သွားချင်တယ်။
သတ်ဖြတ်မှုတွေ
ဖိနှိပ်မှုတွေ ပစ်ခတ်မှုတွေရပ်လိုက်ပါ
ဒို့တတွေ မျှော်လင့်ချက်မဲ့နေတယ်
ဒီဘဝရဲ့မှတ်တိုင်ထဲ။
အတ္တမာနတွေ လျော့ချလိုက်ပါ
ဒို့တတွေ အပြုံးပန်းလိုနေတယ်
ဖြူစင်တဲ့လောကထဲ
အေးချမ်းတဲ့အနာဂတ်လေး
တည်ဆောက်ခွင့်ပေးပါကွယ်…။