"အနာဂတ်ပျောက် ရိုဟင်းသား"
နေရပ်စွန့်ကာ အသက်ကယ်ဖို့
ရောက်ရနေရ သူများပြည်သို့
သိုက်မဲ့ငှက်ပမာ ဘဝကံနှင့်
အားကိုးရာမဲ့ လမ်းလည်းတလွှဲ
ပင်လယ်ထဲမျော သစ်ငုတ်သဏ္ဌာန်
ကမ်းပျောက်လေရှာ ရိုဟင်းသား။
နလှန်ထူဖို့ စိတ်ကူးနှင့်မို့
ရုန်းကန်ထလည်း ငါးစာဖြစ်ရ
ကမ်းစမမြင် ပင်လယ်ပြင်ထဲ
ဂူတွင်းပျက်ခံ ပုရွက်ဆိတ်သို့
နစ်မြှုပ်လို့သေ ဇီဝန်အသက်
မနက်ဖြန်ပျောက်ရှာ ရိုဟင်းသား။
ကိုယ့်ပြည်တွယ်တာ ပြန်ခရီးမျှော်လို့
ဖြုတ်ကျနေတဲ့ ဥက္ကာပျံလို
သက်ကြီးအိုရွယ် နိဂုံးချုပ်နေပြီ
ကျန်ရစ်သားသမီး ရိပ်မဲ့ပင်လည်း
အခါမစေ့ ကြွေကျလုမတတ်
အနာဂတ်ပျောက်ရှာ ရိုဟင်းသား။
နောင်လာနောင်သား လက်ကမ်းဆက်ဖို့
သင့်ရာစာပေ သင်ခွင့်မရ
လှောင်အိမ်ပိတ်ခံ ကျေးငှက်ဟန်
လိုရာပန်းတိုင် မလှမ်းရှာလို့
တိတ်ဆိတ်နေရ လူအပမာ
ဘဝပျောက်လေရှာ ရိုဟင်းသား။
— မိုဟာမတ်ရှားဟ်
Editorial Team
(7-4-2024)
“ရုန်းထွက်ကြပါ တို့ရိုဟင်ဂျာ”
ချစ်ကြခင်ကြ ဆဆပွားလို့
စည်းကြိုးနှောင်ထား တို့လူငယ်
မျိုးစေ့အမှန် ခေတ်နောက်မပြန်
တွေးတောကြံဆ ရုန်းထွက်ကြ။
စိတ်မဆိုးကြေး မေတ္တာပွားလေ
စိတ်ဓာတ်ကြံ့ခိုင် သွေးမကွဲနိုင်
အမျိုးအရေး တို့အရေး
ထိပ်ထားကျေပွန် တစ်ထမ်းတည်း။
ညီကာစည်းကာ ရှေ့ဆက်ပါ
အများအကျိုး တို့အကျိုး
သယ်ရင်းပိုးရင်း အားဖြည့်ပါ
ချုံးချုံးကျတဲ့ အတိတ်ဘဝ
သိမ်ငယ်စိတ်ရဲ့ ပင့်ကူအိမ်မှ
ရုန်းထွက်ကြပါ တို့ရိုဟင်ဂျာ။
— TTM (အဏ္ဏဝါနီသွေး)
(15-07-2021)
Editorial Team